శ్రీ రామాయణం అయోధ్యకాండ సర్గ 43
తతః సమీక్ష్య శయనే సన్నం శోకేన పార్థివమ్.
కౌసల్యా పుత్రశోకార్తా తమువాచ మహీపతిమ్..2.43.1.
రాఘవే నరశార్దూలే విషముప్త్వాహిజిహ్మగా.
విచరిష్యతి కైకేయీ నిర్ముక్తేవ హి పన్నగీ..2.43.2..
వివాస్య రామం సుభగా లబ్ధకామా సమాహితా.
త్రాసయిష్యతి మాం భూయో దుష్టాహిరివ వేశ్మని..2.43.3..
అథ స్మ నగరే రామశ్చరన్ భైక్షం గృహే వసేత్ .
కామకారో వరం దాతుమపి దాసం మమాత్మజమ్ ..2.43.4..
పాతయిత్వా తు కైకేయ్యా రామం స్థానాద్యథేష్టత:.
ప్రదిష్టో రక్షసాం భాగ: పర్వణీవాహితాగ్నినా..2.43.5..
గజరాజగతిర్వీరో మహాబాహుర్ధనుర్ధర:.
వనమావిశతే నూనం సభార్య స్సహ లక్ష్మణ:..2.43.6..
వనే త్వదృష్టదు:ఖానాం కేకయ్యానుమతే త్వయా.
త్యక్తానాం వనవాసాయ కాన్వవస్థా భవిష్యతి..2.43.7..
తే రత్నహీనాస్తరుణా: ఫలకాలే వివాసితాః.
కథం వత్స్యన్తి కృపణాః ఫలమూలైః కృతాశనాః..2.43.8..
అపీదానీం స కాలస్స్యాన్మమ శోకక్షయ శ్శివ:.
సభార్యం యత్సహ భ్రాత్రా పశ్యేయమిహ రాఘవమ్..2.43.9..
శ్రృత్వైవోపస్థితౌ వీరౌ కదాయోధ్యా భవిష్యతి.
యశస్వినీ హృష్టజనా సూచ్ఛ్రితధ్వజమాలినీ..2.43.10..
కదా ప్రేక్ష్య నరవ్యాఘ్రావరణ్యాత్పునరాగతౌ.
నన్దిష్యతి పురీ హృష్టా సముద్ర ఇవ పర్వణి..2.43.11..
కదా.?యోధ్యాం మహాబాహు: పురీం వీర: ప్రవేక్ష్యతి.
పురస్కృత్య రథే సీతాం వృషభో గోవధూమివ ..2.43.12..
కదా ప్రాణిసహస్రాణి రాజమార్గే మమాత్మజౌ.
లాజైరవకిరిష్యన్తి ప్రవిశన్తావరిన్దమౌ..2.43.13..
ప్రవిశన్తౌ కదా.?యోధ్యాం ద్రక్ష్యామి శుభకుణ్డలౌ .
ఉదగ్రాయుధనిస్త్రింశౌ సశ్రృఙ్గావివ పర్వతౌ..2.43.14..
కదాసుమనసః కన్యాద్విజాతీనాం ఫలాని చ.
ప్రదిశన్తః పురీం హృష్టా: కరిష్యన్తి ప్రదక్షిణమ్..2.43.15..
కదా పరిణతో బుద్ధ్యా వయసా చామరప్రభ:.
అభ్యుపైష్యతి ధర్మజ్ఞస్త్రివర్ష ఇవ మాం లలన్..2.43.16..
నిస్సంశయం మయా మన్యే పురా వీర! కదర్యయా.
పాతుకామేషు వత్సేషు మాత.?ణాం శాతితాస్స్తనా:..2.43.17..
సాహం గౌరివ సింహేన వివత్సా వత్సలా కృతా.
కైకేయ్యా పురుషవ్యాఘ్ర! బాలవత్సేవ గౌర్బలాత్..2.43.18..
న హి తావద్గుణైర్జుష్టం సర్వశాస్త్రవిశారదమ్.
ఏకపుత్రా వినా పుత్రమహం జీవితుముత్సహే..2.43.19..
న హి మే జీవితే కిఞ్చిత్సామర్థ్యమిహ కల్ప్యతే.
అపశ్యన్త్యా: ప్రియం పుత్రం మహాబాహుం మహాబలమ్..2.43.20..
అయం హి మాం దీపయతే సముత్థితః
తనూజశోకప్రభవో హుతాశన:.
మహీమిమాం రశ్మిభిరుద్ధతప్రభః
యథా నిదాఘే భగవాన్ దివాకర:..2.43.21..
ఇత్యార్షే శ్రీమద్రామాయణే వాల్మీకీయ ఆదికావ్యే అయోధ్యాకాణ్డే త్రిచత్వారింశస్సర్గ:..
శ్రీదీపిక 