ముంగిలి » AyodhyaKaanda » అయోధ్యకాండ సర్గ 95

అయోధ్యకాండ సర్గ 95

శ్రీ రామాయణం అయోధ్యకాండ సర్గ 95

అథ శైలాద్వినిష్క్రమ్య మైథిలీం కోసలేశ్వరః.
అదర్శయచ్ఛుభజలాం రమ్యాం మన్దాకినీం నదీమ్..2.95.1..

అబ్రవీచ్చ వరారోహాం చారుచన్ద్రనిభాననామ్.
విదేహరాజస్య సుతాం రామో రాజీవలోచనః..2.95.2..

విచిత్రపులినాం రమ్యాం హంససారససేవితామ్.
కమలైరుపసమ్పన్నాం పశ్య మన్దాకినీం నదీమ్..2.95.3..

నానావిధైస్తీరరుహై ర్వృతాం పుష్పఫలద్రుమైః.
రాజన్తీం రాజరాజస్య నలినీమివ సర్వతః..2.95.4..

మృగయూథనిపీతాని కలుషామ్భాంసి సామ్ప్రతమ్.
తీర్థాని రమణీయాని రతిం సఞ్జనయన్తి మే..2.95.5..

జటాజినధరాః కాలే వల్కలోత్తరవాససః.
ఋషయ స్త్వవగాహన్తే నదీం మన్దాకినీం ప్రియే..2.95.6..

ఆదిత్యముపతిష్ఠన్తే నియమాదూర్ధ్వబాహవః.
ఏతే పరే విశాలాక్షి! మునయ స్సంశితవ్రతాః..2.95.7..

మారుతోద్ధూతశిఖరైః ప్రనృత్త ఇవ పర్వతః.
పాదపైః పత్రపుష్పాణి సృజద్భిరభితో నదీమ్..2.95.8..

క్వచిన్మణినికాశోదాం క్వచిత్పులినశాలినీమ్.
క్వచిత్సిద్ధజనాకీర్ణాం పశ్య మన్దాకినీం నదీమ్..2.95.9..

నిర్ధూతాన్వాయునా పశ్య వితతాన్పుష్పసఞ్చయాన్.
పోప్లూయమానానపరాన్పశ్య త్వం జలమధ్యగాన్..2.95.10..

తాంశ్చాతివల్గువచసో రథాఙ్గాహ్వయనా ద్విజాః.
అధిరోహన్తి కల్యాణి నిష్కూజన్త శ్శుభా గిరః..2.95.11..

దర్శనం చిత్రకూటస్య మన్దాకిన్యాశ్చ శోభనే.
అధికం పురవాసాచ్చ మన్యే తవ చ దర్శనాత్..2.95.12..

విధూతకలుషై స్సిద్ధైస్తపోదమశమాన్వితైః.
నిత్యవిక్షోభితజలాం విగాహస్వ మయా సహ..2.95.13..

సఖీవచ్ఛ విగాహస్వ సీతే మన్దాకినీం నదీమ్.
కమలాన్యవమజ్జన్తీ పుష్కరాణి చ భామిని..2.95.14..

త్వం పౌరజనవద్వ్యాలానయోధ్యామివ పర్వతమ్.
మన్యస్వ వనితే! నిత్యం సరయూవదిమాం నదీమ్..2.95.15..

లక్ష్మణశ్చాపి ధర్మాత్మా మన్నిదేశే వ్యవస్థితః.
త్వం చానుకూలా వైదేహి ప్రీతిం జనయథో మమ..2.95.16..

ఉపస్పృశంస్త్రిషవణం మధుమూలఫలాశనః.
నాయోధ్యాయైన రాజ్యాయ స్పృహయే.?ద్య త్వయా సహ..2.95.17..

ఇమాంహి రమ్యాం మృగయూథశాలినీం
నిపీతతోయాం గజసింహవానరైః.
సుపుష్పితాం పుష్పభరైరలఙ్కృతాం
నసో.?స్తి య స్స్యాన్న గతక్లమ స్సుఖీ..2.95.18..

ఇతీవ రామో బహుసఙ్గతం వచః
ప్రియాసహాయ స్సరితం ప్రతి బ్రువన్.
చచార రమ్యం నయనాఞ్జనప్రభం
స చిత్రకూటం రఘువంశవర్ధనః..2.95.19..

ఇత్యార్షే శ్రీమద్రామాయణే వాల్మీకీయ ఆదికావ్యే అయోధ్యాకాణ్డే పఞ్చనవతితమస్సర్గః.

స్పందించండి

Fill in your details below or click an icon to log in:

వర్డ్‌ప్రెస్.కామ్ లోగో

You are commenting using your WordPress.com account. నిష్క్రమించు / మార్చు )

ట్విటర్ చిత్రం

You are commenting using your Twitter account. నిష్క్రమించు / మార్చు )

ఫేస్‌బుక్ చిత్రం

You are commenting using your Facebook account. నిష్క్రమించు / మార్చు )

గూగుల్+ చిత్రం

You are commenting using your Google+ account. నిష్క్రమించు / మార్చు )

Connecting to %s